ياجماعه من يتذكر أيام الدراسة بالخفجي زماااااااان من أيام الصنادق نعم أي بيوت الشينكو والله إني عشت أحلى أيام عمري على فكرة اللي سكن بالشينكو هم أهل الخفجي الاصليين والباقي ما عليهم زود ، عموماً والله ذكريات حلوه مررررره يوم أروح للمدرسة يومها مدرسة عمورية الإبتدائية يوم كان مديرها الله يذكره بالخير الاستاذ / سالم الرحيل والوكيل الأستاذ / سعد ناجع السبيعي ومدرسنا كان الاستاذ الفلسطيني / محمد قاسم المربي الفاضل بصراحه درسنا كلنا أنا وإخواني الحقيقه كان مدرس قدير سمعت إنه ما تقاعد إلا قبل فترة بسيطه يستاهل عز الله إنه مدرس ومربي بنفس الوقت ومن بعد المدرسين الاستاذ راسم الاشقر مدرس العلوم وكان فيه مدرس أقشر يضربك حتى تفهم وطبعاً لهذا لمصلحتك ما أدري منهو الله يذكره بالخير أعتقد إنه استاذ / اسامه والعلامه (كان دايم يحط إيده ورا ظهره ) إذا ما عرفت المسألة أو ما حليت الواجب ما تدري إلا اليد اللي ورا بوجهك !! وبصراحه على إيده فهمت القسمة والضرب !!!! ومن بعد اللي درسونا بالصف الرابع والخامس أساتذه من الاحساء والجبيل أمثال اللي أذكرهم اللحين مثل الاستاذ / علي راشد البوعينين وأبشركم الرجال قابلته بالجبيل بالصدفه وطيب وتذكرنا أنا وياه أيام مدرسة عمورية وأيضاً الاستاذ القصيمي القدير / عبدالله الشيحان أستاذ الدين والاجتماعيات كان شديد وبنفس الوقت طيب ويدور مصلحة الطالب وأحياناً كان يصير يمسك مدير أو وكيل على ما أذكر ومره ضرب واحد ( فلكه ) يعني يعلقون رجليه الفراشين ويجي يضربه بعصا حتى يتأدب أذكر إنه واحد كان يدخن أو ماشابه ذلك الله يستر عليه وعموما المدرس الشيحان أو الشحيتان ما أذكر وكان يساعده مدير المدرسة سالم الرحيل وكان هذا أمام وموافقة ولي أمر الطالب بصراحه كان لهم هيبه الله يذكرهم بالخير ويرحمهم إذا كانوا ميتين ويعطيهم العافيه إذا كانو حيين 00 وايضاً أذكر مدرس الرياضه الاستاذ المصري احمد العبدالقادر الحقيقه محترم ومعروف بكل الخفجي وكان شديد بنفس الوقت وأنا أذكره حتى وصلت الثانوي وهو بالمدرسة وبعدين انتقلت لمدرسة المتوسطه كانت بجنب عموريه اسمها مدرسة هارون الرشيد وكان مديرها في ذاك الوقت الله يذكره بالخير الاستاذ / سعيد القحطاني وصححو لي إذا كنت غلطان وكان له هيبه ومن المدرسين الاستاذ / شمري حبيب أعتقد أن إسمه فيصل الشمري كان يدرسنا رياضيات والاستاذ ابو رحاب كان يدرسنا دين واللغة العربية يدرسنا ابوحسان سوري وعلوم ناصر الدخيل سعودي بس الشكل كويتي والجغرافيا الاستاذ / خالد الضعيان كان دايم يطلعني بالإذاعة وبعدين انتقل مدير المدرسة سعيد القحطاني وعينو سعيد جلاله أو سعد جلاله القحطاني تقريباً 00 وأذكر المقصف كان يبيع أحيانا فلافل أو خبز وجبن يعطيك خبزه وحبتين جبن مثلث وعلبة فانتا الله على ذيك الايام نروح نتجمع عند الشبك نشوف اللي يفحطون برا 00ولا أنسى الفراش اللي يبيع بالمقصف أبو شريده الحساوي ،، ذكريات جميله ومن الطلاب بالمتوسطه الزملاء أذكر الأخوان / اسحاق كان حارس فريق المدرسة وعبدالله الصغير ( موظف بالجمرك اللحين ) ومحمد العتيبي وسامي الرشيد ( بالشركة ) و خالد القحطاني ( ضابط بالحرس الوطني ) وفيصل سراب وهنداس بخيت وخالد الحسون (اللحين مقدم بسلاح الحدود ) ومحسن الفواز ( طبيب بعسكري الرياض ) ومن بعد خالد الشحيان اللي ابوه المدرس اللي ذكرت سابقاً ( أعتقد إنه سكرتير بمكتب وزير المالية بالرياض ) لإني قابلته بالصدفه بالرياض ومن بعد من زملاءنا عبدالمنعم المزيعل حساوي حبيب ( موظف بأرامكو ) على آخر علمي به قبل 6 سنوات و سالم سلامه اللي ابوه عنده محلات بالتملك بالسوق الله يذكرهم بالخير الحقيقه زملاء دراسة بس ما غابوا عن بالي والمدرسة طلعتهم ما شاء الله اللي ضابط واللي مهندس واللي دكتور الله يذكرهم بالخير جميعاً ومنها إنتقلت للثانوية العامة وكنا خايفين يقولون فيها مدير ما يعرف ابوه إسمه أعتقد الأسمري كان شديد الله يذكره بالخير وكان الوكيل العبدلي الشاعر المرهف الله يذكره بالخير وأول ما جينا للثانويه عطانا الاسمري محاضره طويله عريضه عن اللبس والدلع اللي كان بالمتوسطه لأن كان معنا طلاب من اللي ساكنين بسكن الشركة بعضهم أجانب أي فلسطنيين ومصريين لأن ما كان مدرسة ثانويه إلا هذي المدرسة بس ، وطلب منهم مدير المدرسة الاسمري إن يلبسون ثياب وشمغ وتعال شف اللبس الله يا زين هاك الايام وكانت المدرسة أشبه بمعسكر من شدة المدير تذكرت كان وكيل المدرسة واحد إسمه محمد الحشاش سعودي بس شكل كويتي كان الله يذكره بالخير قصير القامه بس إنسان فاهم يعني عنده علم عموما نكمل وأيام الشتا يطلب من الطلاب ولا واحد يجيني بثوب صيفي ( محافظة على صحته ) واللي مايقدر يحوله على الجمعيات الخيرية نعم ويا ويل اللي يغاب بدون عذر ؟؟؟؟ عموماً كان ضابط الثانويه صح وبعد سنه تم إنتداب المدير الاسمري إلى الفلبين لمدة سنتين على ما أذكر ورجعت الفوضى للثانويه وكثر الهروب والدخان والطلعات يوم مسك الحشاش المدرسة مهوب تقليل بهيبته بس لإنه ما يضرب وحبيب ابن الحلال ؟؟ وكانت المشاكل تاصل الاسمري وهو في الفلبين ويقول (آآه بس لو أجي ) حسب كلامه أو ما رجع الله يذكرهم بالخير وكان من الأساتذه أيضاً بالثانوية الاستاذ / علي الشارخ حبيب كان يدرسنا تاريخ وجغرافيا وكان فيه مصري إسمه استاذ / ابو رحاب كان عصبي مره إلى درجة إنه يكسر الفصل إذا عصب كان يدرسنا لغة عربية وفيه اسامه انجليزي ومن الاصدقاء بالقسم الأدبي خالد الدوسري (خلود) واخوه (حمود) محمد الدوسري و راضي الشمري راعي الحفير وخالد الحسون اللي ذكرت سابقاً وعبدالله الصغير ابو صغير وهباس وخالد مسلم الشمري ( مدرس الآن ) وفايز خضير الرويلي وخالد خلف الشمري الله يذكرهم بالخير عز الله إنهم ونعم الاصدقاء ما يجي منهم إلا الطيب وأذكر مشرف اجتماعي او المرشد الطلابي جديد جاء وحنا آخر سنه الله يذكره بالخير الاستاذ / محمد ال صمع ( من يعرف عنه شي يقول لي الله يخليكم ) وكان حبيب وزميل لنا ومن الطلاب الاصدقاء بدر ذيب العنزي وخالد شحاده العنزي ومحمد الغريب وكلهم ونعم والف نعم قابلت كذا واحد منهم وتذكرنا الايام الحلوه اللي قضيناها سوا وكان فيه بوفيه نروح لها في شارع 25 الله ياذاك الشارع كان مشهور إسمها بوفية (ابوتفله) أعزكم الله بس يسمونه كذا ما أدري إذا كانت إلا الآن أم لا بس كان عنده فلافل حلوه كنا نروح لها لإن ما يعجبنا أكل المقصف لأنه زحمه وما فيه تنظيم كلن يدف يعني تبي تفطر يعني تبي تبهذل 00 وبعد الطلعة شوف اللي يستعرض بسيارته أأأه ذيك الايام أيام الدداسن المنزله والزد اكس والقراندي أي كرسيدا اللي تاخذ العقل ذاك الوقت قدام الثانوية وأنا كان مكاني عند الدريشه اللي على الشارع أشوف اللي رايح واللي جاي وبالي مهوب مع المدرس وكان المدرس الله يذكره بالخير استاذ سوداني ما أذكر إسمه يقولي دائماً وين أنتا ببرج مطار تراقب !! الله يذكر من ذكرت بالخير وتخرجنا من الثانوية وتفرقنا وطلعنا من الخفجي وما ندري عن علوم بعض الزملاء و ياليت اللي حاب يضيف من ذكرياته أيام الدراسة يذكرها من باب الذكرى الجميلة وتحياتي للجميع وسبحانك اللهم بحمدك استغرك وأتوب إليك . تحياتي للجميع
شـــــــكــــــرا لــــك اخــــي الــعــزيــز وبـــــارك الــلـــــه فـــــيــــك قليل اللي يذكر زملائة او يسأل عنهم في هذا الزمن فكل الشكر والتقدير لك ولموضوعك الطيب .
اقتباس:
(كان دايم يحط إيده ورا ظهره ) إذا ما عرفت المسألة أو ما حليت الواجب ما تدري إلا اليد اللي ورا بوجهك !! وبصراحه على إيده فهمت القسمة والضرب
هذا مدرس الرياضيات الفلسطيني محمد ناجح الله لايذكره بخير الى الان نتحلم فيه .
مشكور أخوي العلمين على المرور وذكرتني باسم الاستاذ / محمد ناجح الله يذكره بالخير بس اخوي العلمين ما قلت لي ذكرياتك بالخفجي ايام الدراسة عموماً مشكور ايضاً وعقبال باقي الاعضاء تحياتي
ياااااااا ألله أحسن انك فتحت لي دولاب قديم مليان ذكريات غطاها الغبار و دفنها
رجعتني 15 سنه عموريه و مدرسة عبد الرحمن بن عوف و درست الأبتداء بمدرسة أنس بن مالك كان مديرنا العفنان كان كلما أشوفه وجهه معصب ما عمره ضحك لدرجت كنت أخاف يضربني فإذا شفته يمين رحت يسار و إذا شفتها قدامي ديورت و ذكرتنا بحرتنا كانت تراااب و كنت بالثاني البتدائي و أخذتني امي و روشتني و بدلت ملابسي لأن كان بيجونا ضيوف و بعدين طلعت جمب الباب و لعبت بالطين و مليت ملابسي و شعري و أماي المسكينه جالسه دور علي داخل البيت ههههههه
بعدها عرفت أني برى نادتني نادتني و أنا ماني جمبها مشغول بالطين بعدين قالت لي تعال خذ حلاوه و لما جيت لها ياليتي ما جيت أنجلدت جلد أحس اني بغيت اموت هههههههههههه .
مشكور اخوي hamad على المرور ويا حلوها من ذكريات نعم اخوي مدرسة عمورية ومدرسة أنس من مالك اللي مديرها الله يذكره بالخير عبدالعزيز العفنان وذكرياتك بصراحه جميله مع أيام الطفوله وبداية الدراسة وكلنا مر علينا اللي مر عليك والحقيقه شي حلو وما ذكرتلي اخوي من زملائك ايام الدراسة سواء بعمورية او أنس بن مالك اللي اذكر موقعها خلف المعارض فارجو ذكر زملاء الدراسة ان امكن وذلك من باب التو اصل جزاك الله خيرا اخي الحبيب 00
و الله الزملاء ايام الأبتدائي ما أذكر منهم أحد غير الي كان جالس جمبي على يميني مدري يساري كان اسمه صالح العفنان ولد مدير المدرسة انس بن مالك و إذكر بعد حاتم
و بنسبه للعموريه درسة فيها بس رابع الأبتدائي و كانت الأزمه( الغزو على الكويت) توها خالصه فكانت مدرسة عموريه اول مدرسه فتحت أبوابها بعد الأزمه و كان بصفي بالرابع الأبتدائي (( عبد العزيز ، مناف البسام ، جمال عوض ، و الباقي ما أذكرهم بصراحه .
الله يالموادع .. وش هالذكريــــــــــــات .. صار لي 8 سنوات ما طبيت الخفجي
طبعا من كلامك واضح انك اكبر مني عمر .. انا انولدت ايام الصنادق بس ما اتذكر بصراحه هذيك الايام ..
الله الله على الحقبة الجميلة من ذلك الزمن الجميل ..
ذكرتني بانس بن مالك .. وبالعفنان .. وسعيد رضوان الله لا يرضى على العدو كان يشلع فينا على رجله وضرب بعصا البلياردو .
وسعيد البنا حق الفنيه .. واللي مستحيل انساه محمد حسنين هذا درسني اول ابتدائي (صعيدي كان يدرسنا بلبس الصعايده .. مره ازرق مره رصاصي) ماعنده الا هالثنين .. الله يذكره بالخير .. والحكي بيطول عن انس بن مالك
.. زمان ياخفجي والله.
بعدين من قدي رحت لعبدالرحمن بن عوف كنت اروح لها مشي .. .. ..
بس ما اذكر مدير ولا وكيل بس اتذكر مرشد طلابي (هاجري) الله يذكر بالخير
.. واتذكر طيب الذكر استاد طه (سوداني) كان يدرسنا نصووص ومعاه الواير حق المكيف ومافيه الا طق ( الله يذكره بالخير) .. والفرق تمام استاذ العلوم/ دفع الله (( الله يدفع البلى ما يطيقني ولا اطيقه )).
والاستاذ الفيلسوووف فايز ههههههههههه .. عاد هذا ما ينسي.
وكلهم كوم وراسم الاشقر كوم كان يطالبنا بنوعية معينة من الدفاتر لازم نشتريها هذاك الاحمر واطرافه سود .
السؤال هذاك الوقت من كان مدير عبدالرحمن بن عوف ؟؟؟؟
وبعدها الثانوية عند عبدالرحمن بن مشبب الاسمري .. وصرنا نداوم بعقال .. الله الله يا اول ثانوي عند الاستاذ محمد سعد (ابو جرس) كان يلحن لنا النصوص تلحين .. ويتكلم فصحى مخلوطه بمصري .. كانت حصصه رهيبه بصراحه بس بعدها يدخل عليك / محمد البخاري ويكرهك بام الدراسه ..
هذا قليلاً من ذكريات الدراسة .. والإفطار بكافتريا حنان اللي يخبط لك بام التشباتي تخبيط ..
بس المهم يالموادع بوفية (ابو تفله) ههههههه .. المفروض هالبوفيه يصير لها فروع على مستوى مناطق المملكة بصراحة .. والمقهى حق سرندل طيب الذكر..
للامانه من اجمل ايام العمر بالخفجــــي وبس وياطيب ناسها .. ولي رجعه
مشكور زمان الخفجي على المرور الحقيقة أضفت إلى ذاكرتي أشياء جميلة تذكرتها مجدداً اخوي ممن ناحية العمر ما دامك انولدت بالصنادق ما بيني وبينك فرق كثير ونسأل الله تعالى العمر المديد على الطاعة عموماً قلت انك درست بأنس بن مالك الإبتدائية وعبدالرحمن بن عوف المتوسطة يعني من سكان حي ( الغربية ) أو الدخل المحدود أو التملك أو المثلث صحيح ؟ ومن المدرسين اللي ذكرت ما عرفت إلا اثنين الاستاذ / راسم الاشقر والاستاذ / دفع الله احمد دفع الله حتى أني أذكر الاسم صح لأنه درسني خصوصي رياضيات وكان يفهم المعادلات بطريقة سهله الله يذكرهم بالخير 00 الله على ذيك الايام ذكرتني ببوفية حنان اللحين تذكرتها اللي يخبط ( الشباتي ) من ذيك الايام وأنا ما ذقت شباتي ودي أجي للخفجي وأتذكر كل شارع فيها 000 وأمر على المدارس كلها مدرسة مدرسة وأسترجع الذكريات الجميلة 00 بس يقولون لو جيت للخفجي اللحين ما تعرفها وتضيع فيها صحيح يا زمان الخفجي ؟؟ أهم الشوارع اللي نعرف لا زالت إلا الآن شارع 25 الشمالية شارع الذهب التملك شارع نايف عشيرق والصناعية وأذكر أنها شارع واحد وعلى ما أذكر بعد إن فيها بوفية واحد فلسطيني إسمه محمود احسن واحد يسوي حمص ومسبحه الله يذكره بالخير وهو للحين فيه وإلا راح ؟ والمدارس مدرسة عمورية أعتقد لا زالت باقية إلى الآن ومدرسة هارون الرشيد والثانوية العامة وبعد لازالت هذه المدارس إلى الآن صحيح يا زمان وأبي وصف للخفجي الآن منك يا زمان أو باقي الأعضاء الأعزاء لو واحد يتفضل علينا بصور للخفجي الآن ( تحياتي للمشرف العام على المنتدى ) الرجاء تلبية طلبي فضلاً لا أمرا لأننا ( نتوق ) أي نشتاق لمدينتنا الخفجي وحتى نقول لعيالنا شوفو المدينة الجميلة اللي ربينا ونشأنا وتعلمنا فيها ومشكور اخوي زمان الخفجي على المرور وآمل التواصل
ذكرى تحية طيبه
شكراً على المرور
والمفروض إسمك على مسمى (ذكرى) أكيد عندك ذكريات عن الخفجي وياليت تذكرينها لنا على سبيل إحياء الذكرى الجميلة التي عشناها بالخفجي .
وما وضحتي لنا وش تغير بالخفجي وقلتي ان الخفجي اللحين غييييييييير !! وإنها صارت مدينة حلوه يا ريت صور حديثة عن الخفجي إذا ممكن ، والحقيقة الكورنيش أسمع عنه كثير خاصة الشباب اللي يروحون للكويت يمدحونه كثير اذا مرو من عنده ويقولون لا بد لنا وقفه واخذ الصور بس يا ريت يحافظون عليه أهله من عبث العابثين ومن ناحية أنظف كورنيش بالشرقية نعم صحيح أنا قريت عنه مقال بجريدة الرياض بأنه أنظف كورنيش بالمنطقة نظراً لقلة المصانع بالمحافظة مما جعله في مصاف الشواطئ النظيفة بالمنطقة الشرقية حسب تقرير منظمة بيئية تابعه لارامكو السعودية . وعموماً مشكوره ويا ليب نشوف ذكرياتك الجميلة إذا ممكن تحياتي وتقديري
أيــــ الدراسة ــــام بالخفجي زمااااان (ذكرياتي)
.. انا انولدت ايام الصنادق بس ما اتذكر بصراحه هذيك الايام .. 
.. 
كوم كان يطالبنا بنوعية معينة من الدفاتر لازم نشتريها هذاك الاحمر واطرافه سود 
ويكرهك بام الدراسه ..
العرض العادي
